قصائد مؤلمة عن عقوق الوالدين ,شعر عن عقوق الام , شعر مؤثر عن عقوق الاب , اشعار عن عقوق الابناء للوالدين
وين انت يا حمدان امـك تناديـك .. وراك مـا تسمـع شكايـا وندايـا
يا مسندي قلبي على الدوم يطريـك .. ما غبت عن عيني وطيفك سمايـا
هذي ثلاث سنين والعيـن تبكيـك .. ما شفت زولك زايـر يـا ضنايـا
تذكر حياتي يـوم اشيلـك واداريك . . والاعبـك دايـم وتمشـي ورايـا
ترقد على صوتي وحضني يدفيـك .. ما غيرك احدٍ ساكن فـي حشايـا
واليا مرضت اسهر بقربك واداريك .. ما ذوق طعم النوم صبـح ومسايـا
ياما عطيتك من حنانـي وبعطيـك .. تكبـر وتكبـر بالأمـل يـا منايـا
لكن خساره بعتني اليـوم وشفيـك .. واخلصت للزوجه وانا لي شقايـا
انا ادري انها قاسيـه مـا تخليـك .. قالت عجـوزك مـا ابيهـا معايـا
خليتني وسط المصحه وانا ارجيك .. هذا جزا المعروف وهـذا جزايـا
يـا ليتنـي خدامـة بيـن اياديـك .. من شان اشوفك كل يوم برضايـا
مشكور يا ولدي وتشكر مساعيـك .. وادعـي لـك الله دايـم بالهدايـا
حمدان يا حمـدان امـك توصيـك .. اخاف من تلحق تشـوف الوصايـا
اوصيت دكتور المصحه بيعطيـك .. رسالتـي واحروفهـا مـن بكايـا
وان مت لا تبخل علـي بدعاويـك .. واطلب لي الغفران وهـذا رجايـا
وامطر تراب القبر بدموع عينيـك .. ما عـاد ينفعـك النـدم والنعايـا
يا يمّـه .. منتهـي جيتـك وطالـب منـك الغفـران
أقبّـل قـاعـة أقـدامـك .. واغسّلـهـا بدمعـاتـي
يا يمّه .. كـل مـا فينـي ينـاديلـك أنـا ندمـان
طلبتـك قولـي سامحتـك وردي لوجهـي بسمـاتـه
أن أدري قلبـك الطيـب كسرتـه بصدمـة النكـران
غلطـت وغلطتـي هـذي .. تعيّـر كـل غلطاتـي
تشوفي الشيب يا يمّه .. تـرى ماجـا وإنا فرحـان
ورب اللـي رفـع ذاتـك ونـزّل لـلـردى ذاتــي
فقدت الراحة مـن بعـدك فقـدت الطيبة والتحنـان
بدونـك راحتـي غاية .. يبدينك هـذي راحاتـي
أنا .. أنا بعدك ولا حاجه أنـا بعـدك تـرى عميـان
أشــوف … ولا أشــوف الـلــي يـوريـنـي مساراتي
أنا وسِيد الشقـا والهـمّ مـن بعـدك غدينـا أخوان
يجيـب همـوم هالعالـم … ويرميـهـا بمتاهـاتـي
صدقتي يوم قلتي لـي .. تديـن اليـوم بـس تنـدان
رميتـك فـي بداياتـي … ورمونـي فـي نهاياتـي
أنا .. مـن شالـك بيـده ورمـاك بأسفـل البركـان
نخيتينـي وطلبتينـي … ولا حصلّـتـي نخـواتـي
مثل ما هنتي بعيونـي … عليهـم قلبـي يمّـه هـان
رموني وضعفهـم فزعـه وانـا الدمعـات فزعاتـي
يايمّـه .. لا تظنينـي أنـا مـن فعلـهـم زعــلان
سـواتٍ فيـك سويتـه .. وسـووا فيـنـي سـواتـي
يايمّـه .. يالله ضميـنـي ودفيـنـي بهالأحـضـان
أنـا أدري فيـك مشتاقـه وهمّـك بـس ملاقـاتـي
يايمّه .. يايمّه حييييل ضميني أبي أرتاح أنـا تعبـان
تعبـت أهـرب مـن ذنوبـي أبيـك آخـر مسافاتـي
أباسمع منك أي كلمـة .. لصوتـك مسمعـي ولهـان
أباسمع يمّه .. يمّـه بصوتـك أبذكـر فيهـا نشواتـي
أشوفك ساكته يمّـه .. غفيتـي والا أنـا غلطـان؟؟
غفيتـي يابعـد عمـري .. تعبتـي مـن مواسـاتـي
يايمّه … يايمّه … طالبك قومي إذا لي بعيونك شـان
أشـوف المـوت بعيونـك عساهـا تخيـب هقواتـي
تعالـوا يابشـر شوفـوا أنـا محتـار أنـا تلـفـان
أنا أمي مدري وش فيها ؟؟ أنـا مـدري أنـا احاتـي
أمي أنا ماتت أمي أنا ماتت ؟؟ .. لا .. لا ترى غلطان
أنـا امـي ماتخلينـي عـلـى حـزنـي وونـاتـي
أنـا أمـي قلبهـا طيـب ولا يمكـن تبّكـي إنسـان
أنـا أمـي مـا تبّكينـي … ولا تتمـنـى آهـاتـي
يايمّه صح ما متّي ؟؟؟ وصـح المـوت تـو ماحـان
إذا متّي أنا بعدك أبقضـي ويييييـن ساعاتـي
يايمّه يايمّه قومي يايمّه .. وقولـي المـوت لا ماكـان
أنـا جيتـك وانـا نـاوي أببـدي فييييـك جنـاتـي
تركتينـي ومتّـي ليـه ؟؟؟ تركتينـي وانـا غرقـان
ولا مسمـوح ياولـيـدي .. ولا تلعـنـك لعنـاتـي
أنا الجاني وانا المجني وانـا المخطـي وانـا الندمـان
وانـا بيـدي رميتـك إييييـه … وبعثرتـي ملفاتـي
وجيت من الهنا مفلس وقلبـي مـن الضنـى خسـران
وتركتينـي علـى نـاري أعــدد فـيـك زلاتــي
ولاني مرضـيٍ ربـي … ولانـي تابـع الشيطـان
أنـا بعـدك تـرى مابـيـن نهايـاتـي وبدايـاتـي
يايمّـه منتهـي جيتـك .. وكلـي مرتجـي غفـران
وشفـت الـنـاس تلعـنـي .. وتحـذرنـي مــن الآتــي
قصيدة اب عن ابناءه العاقين
قال الذي يقرا بليا مكاتيب يا للي تقرُّون العمى من عناكم
يا عيال يا للي تشرفون المراقيب تريضوا لي واقصروا من خْطاكم
خوذوا كلام جحيش ما به تكاذيب مثل السند مضمون للي وراكم
ويا عيال وان صرتوا ضيوف ومعازيب ترى الكلام الزين مِلْحت قراكم
وترى البلاسة من كبار العذاريب ترى البلاسه ما تطول لحاكم
يصير بعيون الرفاقة تقل شيب ليا منَّه اقبل قيل هذا بلاكم
المذهب المذهب ترى المذهب الطيب وترى ردى المذهب يبوّر نساكم
ياعيال ما سرحتكم للمعازيب يا عيال ما عمر المعزب ولاكم
يا عيال ما ضربتكم بالمشاعيب ولاسمعوا الجيران لجَّة بكاكم
ياما تسعرت الخلايق تقل ذيب أريد من صيد البراري غذاكم
وياما قطعت من الفياض العباعيب من خوف لا يقصر عليكم عشاكم
أحفيت رجليني بحامي اللواهيب وخليت لحم الريم خالط غداكم
واليوم شوفوا لحيتي كلها شيب وشوفوا محل تخوضعي في ذراكم
قمت اتوكّا فوق عوج المصاليب وقصرت خطايه يوم طالت خْطاكم
يا عيال يا عيالي عليكم مطاليب عطوني القرضه جزا ما وتاكم
خوالكم يا عيال هم ماكر الطيب ولو تتبعون الجد ماحدٍ شناكم
يا عيال يا عيال الخنا كلكم عيب يا عيال مادري هالردى منين جاكم
يا علكم في حاميات الاصاويب ياللي على الوالد خبيث لغاكم
قصيتكم وأسندت وادي سلاحيب ولقيت بالصبخا مدافيق ماكم
يا عيال بعتوني بصفر العراقيب ما هي حقيقة سوَّد الله قراكم
يالله عسى عَماركم شمسها تغيب ويعتم قمركم ثم يظلم سماكم
وعسى نساكم..لا تحمل ولا تجيب ولا حْدٍ من الورعان يمشي وراكم
شفت الجفا والحيف والغلب والريب بطلوعكم لابيض الله قراكم
لابد ما هو عاويٍ دوني الذيب بالقبر ما فرق طيبكم من رداكم
ماني بفاضحكم بوسط الاجانيب بأعمالكم يدرون كل قْرباكم
لوكان تدرون الردى والمعاييب صرتوا مع المخلوق مثل خْوياكم
