شعر عن العزوبيه , قصائد في مدح العزوبي , شعر عن توديع العزوبيه , خواطر عن العزوبية
أنـا العزوبـي وأتقطـع تقـطـاع
على زواج البنـت تدمـع عيونـي
أنا العزوبي وين مارحـت ملتـاع
زين العـذارى يالعـرب جننونـي
أشوفهم في كل روحـه ومرجـاع
من حيـث ماوليـت هـم عذبونـي
فالبيت فالتلفـاز والصـوت مذيـاع
حتى العمل يـا نـاس مافارقونـي
وليا نويت السـوق نـاوي تبضـاع
أروح وارجع منخطف حيل لونـي
ارجع وقلبي حايسٍ بين الأضـلاع
مـن زود دقاتـه تخلـع امتـونـي
اللـي تغنـج فالمشـي بالـتـدلاع
واللي تناظرني بطـرف(ن) فتونـي
وأم العيون السود والرمـش قطـاع
وأم الجدايـل والكحـل بالجفونـي
وأم النقاب اللـي تمصـع تمصـاع
قـدام عينـي والبشـر يشهدونـي
كنهـا تمتـع فـي عذابـي تمتـاع
وأنا العزوبي كان ربي فـ عونـي
وأهل الجنوز الضيقة وأهل الاوساع
مدري وش اللي حدهـم يلبسونـي
منهم تجرعـت المـرارة تجـراع
في كل يوم يزيد همـي وحزونـي
لو نطلع المريخ في لحظـه وسـاع
نلقـى العوايـل قبلنـا يطلعـونـي
من بعد طرح وجمع وهموم وصراع
قررت أنا اخطب بنت وانهي ظنوني
وفي ليلة الفرحة تقول إني مرتـاع
ومن زود ما فيني تراقـل سنونـي
أبوها قـال اليـوم مانـي بطمـاع
عندي شروط(ن) للمهر واعذرونـي
يقوم يوحي لي ويشـر بالاصبـاع
يبغي المهـر ميتيـن أو يكثرونـي
يقول يبغى العرس في قصور وقلاع
ونبغي ذهب لام العروس المزونـي
ونبغي الحلا والكيك من كل الأنواع
تبـون وإلا ياعـسـى ماتبـونـي
ناس ٍ تحسب البنت شروه ومبيـاع
تبي المكاسـب لـو زادت ديونـي
ما همهم لو زاد همـي والأوجـاع
ما همهـم ياكـود ملـي البطونـي
يـا مؤمنـن بالله ساجـد وركـاع
بنتك أمانـه حـاذر انـك تخونـي
لا تعنس ابنيتك في سّبـت إشبـاع
نفسك وجمـع افلـوس ماينفعونـي
بكره ليا جتـك المنيـة والأوجـاع
تنـدم ولا ينفعـك دمـع العيونـي
الخيمة اللي بدون عمـدان وشـراع
يمكـن تطيرهـا الهبايـب بهونـي
أنـا العزوبـي وأتسكـع تسـكـاع
تكفـون بالله يالعـرب زوجـونـي
قال العزوبي يوم شـاف المعاريـس *** الرابـح اللـي لاقعـد مايقـومـي
أول سنـة كـلٍ يبـث الاحاسيـس *** وثاني سنة تجلب عليـك الهمومـي
وثالث سنة حط الرمـل والمتاريـس *** لابد مـن حـربٍ تقـوم وتدومـي
لامن دخلـت الـدار لاكنهـا بليـس *** متلفلـفٍ فـي غاليـات الهدومـي
ولاجيت مرة نـاويٍ لـك ب……. *** قالت تصّبـر خـل قلبـك رحومـي
ليتك تساعدنـي تصحـح كراريـس *** زادوا علينا أربع حصص في العلومي
أزوارة في العصر والصبح تدريـس *** والليـل تصحيـحٍ وودي أنـومـي
تبكي إذا جاها وجع لوهـو ضريـس *** وتقول أبي دكتـور ماهـو حكومـي
يروح عمرك بين عرسٍ وتأسيـس *** واربـع سنيـن والبزاريـن كومـي
وسط المطابخ بين قـز ومحاميـس *** هـذا صحـن رزٍ وهـذاك ثـومـي
والا خلصـت إمنظـفٍ الملالـيـس *** جتك تقول انهـج نبـي زود لومـي
ولا جبت قالت اكنس الحوش تكنيس *** خل البلاط يصيـر مثـل النجومـي
ومكرسٍ جهدك من الخوف تكريـس *** وان نادتك بالصوت اقبلـت مومـي
يجيك تـال الليـل دايـم كوابيـس *** ويشيبنـك مزعـجـات الحلـومـي
تعيش يالمعـرس حيـاة المحابيـس *** وشف العزوبي بكل شارع يحومـي
شف العزوبي مايعـرف الهواجيـس *** ولا يـودي حرمتـه كـل يـومـي
يا عنك ماحاش الفخـر والنواميـس *** الا عزوبـيٍ يـعـرف السلـومـي
اذا اعرس المعرس غدا عندنا هيس *** ونزيل اسمه مـن سجـل القرومـي
والى بغيـت البهذلـة والدحاويـس *** فأعرس وخلك من عـداد الرخومـي
وش صابكم من عرسكم يا المفاليس *** وش استفدتوا غيـر دق الخشومـي
اللي تزوج أشهد انـه غـدا تعيـس *** والرابح اللـي ماخـذٍ لـه……….
ترى عناق العام نطت على التيـس *** والحرعقب العـرس يصيـر بومـي
قال المتزوج
قال العريس أنا الذي في سـعاده ××× ماني عــزوبــي ضايق الصدر مهموم
مبسوط من مثلي قعـد عنــد غاده ××× مهوب مثـل اللي لحاله تقل بـــوم
في كل لــيله حاضنٍ لـه وسـاده ××× وانا مـع المـزيون في غـرفة النوم
أنا اشهد انه عايـشٍ في قــراده ××× يروح عــمــره مـا تهنى ولايوم
الى دخــل للبيت يبلش بــزاده ××× يقعد يقــطّـع له طمــاطٍ معه ثوم
ولا قضى عقب العصـر من عداده ××× والـحوض من كثر المواعين مزحوم
والى غسلهن ثم فـك الســـداده ××× دلى يغســل له سـراويل وهــدوم
وان ماطــبخ روّح لمطعـم حمـاده ××× والا قـعد في منزله واعـلن الصوم
وان جاه ضيفٍ باغيٍ لـه رفـاده ××× يـروح يشــري رز وايـدام ولحوم
ما يعرف الشمبو وراسـه عــراده ××× وشــمغه من الكواي ملـيانه رقوم
ما يكنس الفرشــه ويلقط بــداده ××× اما بقـايا رز او خــبز معــروم
عنده صراصيرٍ بحـاجه ابــاده ××× تسـرح وتمرح في الغرف دايم الدوم
له موتر خرده كثير فســـاده ××× في كل يـومٍ في الاشارات مصـدوم
غمارته تقول ورشــة حـــداده ××× ومريقـده في شـنطته دوم محزوم
دوم يتنقل تقــل كنه جــراده ××× في كـل يومٍ نازل له على قــــوم
يسهر والى قام الظهر من رقـاده ××× روّح على شغله والى اليوم مخصـوم
يذي بنات الناس يبغي مـراده ××× في كل يومٍ زاهمٍ له على ( هـــوم )
اراه مايعـرس ويقـدح زنـاده ××× يترك بـنات الناس ويصير معصوم
يلقى هنوفٍ تخـدمه مثـل داده ××× ويصــير رجّالٍ ويسلم من اللوم
يفرح الى من قرب وقت الولاده ××× ويصير معنى العرس بالحيل مفهوم
يشوف أولاده ومعهم شهـــاده ××× قبل الـوفاة وقولة الناس مرحــوم
