ياويلي
روحي فمان الله ورعايه الله
مع السلامه رافقتك السلامه
وانا ليا غنا المغني لليلاه
جريت صوتي في طويل العدامه
وغنيت لك ياتل قلبي من اقصاه
ولاحيت مع وجه العصير الحمامه
وضحكت من (دوّر حبيبك وتلقاه)
القاه عند العرض يوم القيامه
روحي وخلي من نثرني بقاياه
يمضي عليه العمر عامه بعامه
يومٍ بقايا دمعته في مصلاه
يبقى لها لادور يومه علامه
ويومٍ بهامه بين راحة شفاياه
من لوعة الفرقا يعضه ندامه
ويوم يفضفض للمكان وزواياه
عن كل شي ولايكمل كلامه
يصيح صيحة من غوالي دناياه
مامنهم اللي جبر الله عظامه
حزنه من اقصى طعنةٍ في حناياه
ماجابته سبابته من بهامه
تمره اغلى الذكريات وتعداه
ويموت بين الكبر والانهزامه
ما في الضلوع الا متاهه ومضماه
ومافي العيون الا زراقة غمامه
رعاه همك لين بيح خفاياه
واصخوخفت روحه وزاد احتدامه
ادنا مايزعل منه وادنات مرضاه
مثل الغرير اللي على اول فطامه
وان هب نسناس الهبوب وتمثناه
في ليلٍ اغوى العاشقين بظلامه
يسري ولا يدري على وين مسراه
ويسرح ورقاد الضحى في منامه
كم لي وانا الوم الزمان بسواياه
ولاحر من جمر العتب والملامه
الا ضروفٍ ترخي امتون و اجباه
تختار معها الذل والا الكرامه
لو انها بالمال والوجه والجاه
كم من سنافيٍ مقامي مقامه
لكنها رحلة ضياع ومعاناه
يقضي بها المغرم بقية غرامه
اللي على ربه مماته ومحياه
وعلى رقبة غاليه ذنبه واثامه
من كثر مايبدي على الناس شكواه
ماعاد ياجد هيبته وحترامه
بحاول انسى ماحصل وآتناساه
واظهر من الدنيا برجل العمامه
احتاج وجهٍ بسمته في محياه
حاجة فقير راس ماله حزامه
يقول ياويلي على المال ويلاه
واقول ياويلي على الابتسامه
