على العنان مفيش حنفي ( قصة واقعية )

حلقة 1

انهاردة كان عندي موعد هام في مكان قريب من كليتي العزيزة … كلية الهندسة جامعة الاسكندرية

واول ما وصلت عرفت ان الميعاد اتلغي ومحدش بلغ .. اتغاظت غيييييييييييظ

القصد ^_^

كنت قدام خيار م الخيارين .. يا اروح بيتنا زي بنات الناس المحترمين .. يا اخدلي نص ساعة تأمل في البحر لوحدي زي بنات الناس المحترمين برضو ^_^

طلعت علي محل ابو ربيع .. وجيبتلي سندوتشين فول وسندوتش فلافل وعلبة مخلل .. و واحدة سبورت كولا .. ماهي فرصة بقي ولازم ادلع نفسي

وطلعت ع البحر .. وفضلت ادور علي صخرة بعيد عن الناس اقعد اكل عليها لوحدي ولأول مرة اعملها

لأني اكتشفت ان اللي بيستني السعادة من حد غيره .. لا بيطول السعادة .. ولا بيطول نفسه .. اهم حاجة الاكتفاء الذاتي ^_^

قررت اتأمل في البشر اللي رايحين وجايين .. بقالي كتييير معملتش كدة .. مش اطلاق بصر ولا حاجة متقلقوش ^_^

بس التأمل من حين لآخر بيعلمني كتيييير .. وانا فتاة في اشد الحاجة للتعلم من الحياة

اهو هو ده اللي بيسموه .. اكل وبحلقة .. هع

ولقيت كل اللي حوالية حبيبة .. احم احم
:d

حبيبة حبيبة يعني مش اي كلاااااام .. يا عيني البنات والستات دوول سعدااااء .. ميعرفوش انهم غلابة ومضحوك عليهم :))

لقيت واحد مع واحدة قاعدة تحوم حواليه وتغمزله ومنظر كوميديا .. وهو محسسها انه مستجيب معاها

قالتله بأشارة تعالي اجري ورايا .. وطلعوا يجروا ورا بعض ع البحر :)))

قلتلها في سري – وعفوا – يا مجنووووووووووووووونة

هي يا عيني فاكرة انها بتشاغله بطريقة افلام الستينات دي .. ومش عارفه انه بياخدها علي قد عقلها .. بكرة تفتكر الايام دي وتبكي .. مع ان الاولي انها تبكي علي منظرها الاهبل وهي بتجري في الشارع

يا عيني غلبانة

يبدو ان في بعض الحصي دخل في حذائي .. فوقفت علي جنب اخلعه والبسه تاني .

وياريييتني ما وقفت .. اهئ اهئ ..

عايزين تعرفوا ليه؟؟ اقولكم بكرة