اقوال عن رد الجميل , صور رد الجميل , عبارات عن رد المعروف, شعر عن فعل الجميل
للعمر فرصه والجمايل توافيق ………………. ومن لاتوفق ماكتب له جماله
ومن لارقى للطيب روس الشواهيق ……….. مازان له وقته على ما بداله
ومادام لفعول الجمايل عشاشيق ……………. كسب الجمايل ما يجي بالسهاله
ولو أنها تشرب مع فكة الريق…….. ……… كل خذاله كل ما أصبح بياله
والطيب منوه للقلوب المشافيق ……………….. كل يتوق ومنوته راس ماله
والمدح مايزهى على الرجل ويليق…………….. إلا لا صارت وافيات خصاله
يستاهله رجل يفك المزانيق ………. …………. اللي يقال ونعم لاجا مجاله
ومن ساقته نفسه وهو مابعد سيق.. …………. لأجل الجميل يزين الله فاله
والمرجله ماهي بتحتاج تنسيق…. …………. من بين قلب اللي عشقها وباله
ومن عادت الدنيا تخون المواثيق… ……….. تفتر مكرتها سواة المحاله
ولولا اللوازم ماعرفنا المخاليق….. …………. مانعرف الرجال لين إنعناله
والكفو تظهرفزعته حزة الضيق…. ……………. وينشاف في الشدة بعين العداله
نسل الرجال متعبين الملاحيق…… …………… متوسط من بين عمه وخاله
واللي يطيق ولابغى قال ماأطيق… ……………. تحرم عليه المرجله والشكاله
والهينه تكبر على اللاش والهيق… …………… له فى الرخا قاله وفى الضيق قاله
والطيب شاره والضماير صناديق… …………….. واللاش طيبه ماتعدى ظلاله
وأنا أسبر قلوب الرجال المعاليق………………. والصامت أقطع غايته من مقاله
ومادام فى الدنيا رجال ومطاليق…. …………….. نصيتهم واللاش مالي وماله
الموت تالـي العمـر والدنيـا مقيـل
والاخـرة هـي منتهانـا لا مـحـال
واعمال كل انسان لـه منهـا حصيـل
توضع على الميزان وان ما مال مال
وديني وحب النـاس والخلـق النبيـل
ثلاث هي دربي الـى حسـن المئـال
ماهي بلحية شـوق للطـرف الكحيـل
لا ذكـر العقـل الجـوارح بالـزوال
الله يقـدرنـي عـلـى رد الجمـيـل
والله يجملنـي الـى جالـي مـجـال
والله يحـط الستـر لـي ظـل ظليـل
والله يقوينـي علـى وصـل الحبـال
والله ينورنـي لصـار الصبـح ليـل
والله يقدينـي الـى غـاب الـهـلال
والله يروينـي السميـن مـن الهزيـل
لا ضيعوا ويش السمان مـن الهـزال
والله يكثـر كـل ماهـو لـي قلـيـل
الا العيوب وكـل مانقصـه كمـال
والله لا يحوجنـي لمـدات البخـيـل
ويعيضني فـي كـل ماحـرم حـلال
والله لا يذللـنـي لسـطـان الذلـيـل
والله لا يسقيني المذلـة فـي الـزلال
والله يوفقنـي الـى اختـر الخلـيـل
والله يجنبنـي مجالـس قيـل قـال
والله يساعدنـي علـى القـول الدليـل
وستر من المنقـود وألسنـة الرجـال
والله يقومنـي الـى شلـت الثقـيـل
ولا ينوخنـي لـديـن عـبـاد مــال
والله يرحمنـي عقـب عمـر طويـل
وادخل مع السبعة تحـت ذاك الظـلال
