نصتك المعاني
نصتك المعاني
السلام عليكم ورحمة الله وبركاته
ألا يانديبي فوق جيبٍ ماهوب نيسان
ولا حط به خطٍ تحت حرف قيطانه
مواريه ليتاته مثل بارق الرحمن
وليا من فتحت الباب حياك سكانه
ايورد علي الساير من صناعة اليابان
ضعيف المرتب ما وقف عند بيبانه
جديدٍ بتي ما شاف خليف بالصمان
ولا داج به راعي الغنم عند رعيانه
امصمم ابلوفه ما تعوذ من الشيطان
عليه المره في فترة الصنع زعلانه
ايلا من كفخت اسليتره كنه الزعلان
جزع من محله فاقد اعز ورعانه
ايلا أقبل يموح ابمقدمه كنه ابليهان
واليا اقفي مدبر كنه اطيار شيهانه
عذاب المسافه لا أستوى والمقير زان
ينومس غريبٍ منوته شوفة اوطانه
ايا ساقه لامن تقهويت بالديوان
ونخيت الخوي ثم فز واشتل دخانه
توكل علي الله وحروتك مليت الخزان
ولا توقف الا ماخذٍ وصف ديوانه
ابتلقا حلي اللي دفع قيمته سلطان
على الوصف ابوخالد دفع غالي اثمانه
عديم الوصايف واغتنى من وراه اشنان
تعب ما لقاله برقعٍ عند جيرانه
وقبل تلتبس فنشد عن امصخر القيفان
انا ما جذبني له سوي زين قيفانه
ولابه معرفه سابقه مع هاك الانسان
سوي سمعةٍ مثل الزهر وسط بستانه
وعن الشكه انشد وين ضيدان بن قضعان
انا اقول ديوانه ابشرواه مليانه
ولا من عرفته قضبه حاجة الولهان
تعابير قلبٍ شرع الوقت بيبانه
توطاه زلزال الشقى باول الهجران
مثل ما وطى اسطنبول واهتز بناينه
وتقفاه بركان الوله فاضح الولهان
الا يامل قلبٍ ثور البعد بركانه
له الله حنينه لاتذكر هوى الخلان
مثل حنة اللي ضاربٍ خد هشتانه
يساقيه بالقيرات من فنه السكان
وهو خايفٍ قولة توايرك هلشانه
عذابه من اللي كنها قايد الغزلان
عشقها القمر وامست من الزين رويانه
عذاريبها طولٍ تثنيه غصن البان
تعبت انحني له واتثنى على شانه
وعينٍ ليا من سلهمت حاكمه بطران
أليا طالعتني هزت القلب بركانه
وانا ويش ابي بك لو تغاليت يا الرمان
ولها مبسمٍ تفجرت فيه رمانه
وعلى هون ياليلٍ سهرتك شقى وحقران
لها ليل ياما نمت في حروت امتانه
وبلياك يا صبحٍ تعبت انطرك سهران
لها صبح لا ، وجهٍ ينور لجيرانه
اليا من غشاني وصلها كني السلطان
وليا من جفتني صرت من عرض صبيانه
تحكم ابوضعي جنها سلطة ادراغان
على المنتخب يوم المباراة خسرانه
وتامر علي اوامر الظابط الفسقان
علي عسكريٍ حدته لقمة اخوانه
اتشره ولا تقبل مشاريه يا ضيدان
بلتني بلاها الله بمضيع ايمانه
يقولون وادري بالجفا طبه النسيان
وانا اللي عجزت انسي والاعصاب تلفانه
نصتك المعاني لا عدمناك يا ضيدان
تعابير قلبٍ شرع الوقت بيبانه
