اجمل قصائد مكتوبة للشاعر سعد بن جدلان الاكلبي , خواطر واشعار للشاعر سعد بن جدلان

ودنا بالطيب مير الدهر جحاد طيب
كلما تخلص مع الناس كنك تغشها

يدك لا مدّت وفا لا تحرّى وش تجيب
كان جاتك سالمه حب يدك وخشّها

كلما شبيت نار المحبه مع حبيب
قام يسحل في مشاهيبها ويرشها

وكلما واجهت لك في الزمن وجه غريب
مثل ماقال المثل دام تمشي مشها

وذمة ماهيب تندار للحق المصيب
جعل قشاش الحطب لا سرح يقتشها

‏=====

يا ذا الجلال اللي عروشك فوق وأملاكك حدر
مهمن تسامت به عروشه مستحيل يطولها

يا حيّ يا قيّوم يا ذات الأنافه والكبر
ما نافسك في عظمتك مكر العباد وهولها

ولا نافسك من عمر بيوته على سطح القمر
واللي ترسي فوق أقاليم المياه أسطولها

ولا أنت بحاجة من عبد ولا بحاجة من كفر
ولا بحاجة ثابت الدنيا ولا منقولها

أنت السميع لمن حمد وأنت المزيد لمن شكر
واللي ما يشكر نعمة المنعم عليه تزولها

‏=‏====

ياقف الفاضل تحت لوحة مرور الأفضليّة
وتعبر الفوضى مع جسر التحاشي والتغاضي

والأنانية وحب الذات سوت فوضويّه
في طلوع وفي نزول وفي عمار وفي قضاضي

بين قتّاتٍ أثيم وبين كيمرة خفية
وبين مختالٍ فخور وبين هدارٍ خواضي

تضرب المسحوب في عرض اللحون السامريّة
وتسحب أقواس الربابة للجواميس الرباضي

فارشين تحت نوّ الأمل بسط الأحمديه
وكل منهم لابس فتخة زعامة فعل ماضي

والآدمي ما يستريح إلا يعيش بواقعية
لا رضيت بواقعيك صح كل عنك راضي

وإما أنا حقي على الطيب وله حقٍ عليه
نحوهم لا أحطّ تأييدي ولا أحطّ اعتراضي

‏=‏====

يا الله وحنا لك عبيدٍ ملاكا
ولمن يسالك مع رواق السما فكّ

يا مهلك العزّا معزّ الهلاكا
والمبتدا والمنتهى كلها لك

يا مالكٍ مالك بملكك شراكا
افرج لجاشٍ حطّ فيه الدهر حكّ

أبغى اتحاكا ما عرفت آتحاكا
من همّي اللي قاطعٍ له علي صكّ

ضيم الدهر منه النشاما تشاكا
التكّ خلاها دبل والدبل تكّ

عطى ضعيف العقل ياكا وياكا
وإلا حكيم العقل ما يلحقه شكّ