قصيدة عن ذكرى تحرير الكويت , قصيدة عن تحرير الكويت

سلام الله على شعب وحكومة وامراء وأميـــــــــــر =على جابر وابن عمه سعد والحفل وضيوفــــــــه
سلام من الصدور وبالزهور معطر تعطيـــــــــــر =على صحن المحبه مع طلوع الفجر مقطوفــــــــه
تقطف من مهانيع الغصون ولا سقتها بيـــــــــــر =سقتها الناشيات الممطرات وجات زخروفــــــــه
تزخرفها فراشات النبات وحط فيها الطيـــــــــر =على اوتار النشيد يردد الالحان معزوفــــــــه
سعودي يعبر عن مشاعر دولته تعبيــــــــــــــر =من الشعب السعودي جاء يضم الورد بكفوفــــــه
يشارك ليله الذكرى بالاستقلال والتحريــــــــــر =نحبك يا كويت ولك أعــروس الشعر مزفوفـــــــــه
نزف اسمى التهاني والنفوس تعود بالتذكـــــــير =تعيد الذاكرة ما تطوي الأيام ونشوفــــــــــه
تمر الاربعين العام والعشر السنين تسيـــــــــر =موثقة الخطى بالعز والناموس محفوفــــــــــه
نهنيكم باهل دار بنعمتها ربيت صغيــــــــــــر =ولا انساها ولا انسى فضل اخو مريم ومعروفـــــه
صحيح الملح يقنى كل حر ولا يبي تفسيـــــــــــر =نروح ونلتفت وقلوبنا بالدار مشغوفــــــــــه

انا من ناس تقلط ماتهاب وتحسن التدـــــــــــر =مواقفها ما هوب اليوم قبل سنين معروفـــــــه
بطولات نسطرها على وضح النقا تسطيـــــــــــــر =صفحات الشرف مثل الدلال الصفر مصفوفـــــــــه
سمعنا بالاذاعة علم طاري والكلام يثيـــــــــــر =بعد ما صرح القايد شقيقة نجد مخطوفـــــــــه
تسابقنا ولبينا الندا واللي يصير يصيـــــــــر =عوايدنا ولو راحت علينا غبن وحسوفــــــــــه
تجهزنا وجهزنا لباس الحرب والتحضيــــــــــــر =شوي بنبرة القوات والاعتاد مصروفــــــــــــه
تقدمنا بعون الله وراس الخيره التبكيـــــــــــر =مباشرة الهدف تردع هوى الطماع وشفوفــــــــه
طلايع قوةٍ صكت على الجبهة ضحى وعصيــــــــــــر =تواليها بوايلها سوى ماهيب منصوفـــــــــــه
فهد فينا وعبد الله مثل عنتر ومثل الزيـــــــــر =الياحل الخطر بحدودهم تطابحو جوفـــــــــــه
فطاحله الملوك اللي تدور المعركه وتديــــــــر =رحى التوجيه وتبرمج جهاز الحرب وصنوفـــــــه
زعامتنا لها الصدر ولها القدر ولها التأثيــــر =الاصحاب القرار وهم جدار العرب وسقوفــــــــه
لنا في الملحمة حق ووجود ومرتبة تقديـــــــــر = نهار تصبّح الجاره وتفجع كل غطروفــــــــــه
حشدنا ما قعدنا واتخذنا موجز التقريــــــــــر =وجازفنا بحكم تعدل الغلطات بسيوفـــــــــــه
دخلناها بضرب النار والتهليل والتكبيـــــــــر =وركزنا بها الرايات والفزعات مشيوفـــــــــه
صواريخ تساقط باالغضب والطايرات تغيــــــــــر =كوابيس الظلال بسابقات الصوت مقصوفــــــــــه
حصل رزق النسور وما بقي ياطابها الجنزيـــــــر =على ارقاب العدا تمشي جيوش الحق مرصوفــــــه
من الجيران والصدقان أمانه ما جرى تقصـــــــير =وفوا بالواجبات وخطة العدوان مكشوفـــــــــه
حماقات تصدرها البشر منها العقول تحيـــــــــر =مهلوس الزعامة بالأذى والشر مكلوفـــــــــــه
من المخرب تخرّب ما اكتمل في نهضة التطويــــــر =وجدنا المنشآت ومعظم الحارات منسوفـــــــــه
حرايب تشتعل وافعال نكرى مالها تبريــــــــــر =قريب الظهر قطعة ليل كن الشمس مكسوفــــــــه
طبايع تقشعر بها الجلود ومبشع التصويـــــــــر = تقول ان الكويت بفوهة بركان مقذوفـــــــــه
طعنّا جارنا من خلف طعنه ما طعنها الغيــــــــر =يمين لطخة بالخزي والاجرام مندوفــــــــــــه
تنجس من يصافحها واقول انجس من الخنزيــــــــر =وعن بيض الايادي بالشيال السود ملفوفـــــــه

كويت العرب لا ترهب من الانذار والتحذيـــــــــر =وراك البر صامد والسفن في البحر مجدوفــــــه
هبت والله شوارب من غزاك وسبب التدميـــــــــــر =شوارب ما تصون الجار مطليه ومنتوفــــــــــه
نظام ما يراعي حف جيره طبه التغييــــــــــــر =يجي غيره نظام يستتب الامن بصفوفــــــــــــه
على الكرسي غبي ومكابري ومغامري شريــــــــــر =ملا راسه بنشوة كبرياه وطق بالطوفـــــــــــه
عمى ما يستشير ولا يشير ولا يطيع مشيـــــــــر =وقع في فخ موت ومات من ذله ومن خوفــــــــه
كويت العرب يا بيت العرب ما حركك معصيــــــر =صفا جوّك وطاحت ريح اخو مره عاصوفـــــــــــه
تحوّل للعراق وفي سباق الذبح والتهجيــــــــر =ذبح شعبٍ على الله يشتكي بلواه وظروفــــــــــه
يا كثر الرعب والارهاب في الاحزاب والتطهيــــر =تفرس في الجرايم واصبحت عاده ومألوفــــــــه
بساطوره يقطع باللحم متحضنٍ له كيـــــــــــر =يشبه طاغيه بغداد في بغداد وضعوفـــــــــــه
كويت ارسي وبنّي واطمئني وانسي التفكيـــــــر =على شط الخليج مثبته ما انتي بمحذوفــــــــه
تواعيده وتهديده يمر بها الهوى وتطيــــــــر =طموحاته ورغباته بخشم الزند موقوفـــــــــه
هذا صدام يمرر لعبته من جعبته تمريــــــــــر = يبي يضحك على العالم وهو مضحاكة وصوفـــــــه
ما عاد الا يجيب المتر ويمتر لنا تمتيـــــــر =يحسب ان الكويت وخية العشار والكوفـــــــــه
ما هي شيك يوقع في البنوك وقابل التجييــــــر =بلادٍ عنها الايدي باشهب البارود مكفوفــــــــه
أساس الخارطه ما تقبل التعديل والتزويــــــــر =ثلاث مية سنه من يمسح التاريخ وحروفـــــــــه
تبي ترقد على اليمنى وبامان ودونها الحجيــــر =على صهوة جواده ناسف رمحه على كتوفـــــــــه
للراعي ما غدى ناقه ولا ضيّع عقال بعيـــــــــر =عيونه من وراها لو يحوف القوم وجفونــــــــه
صباحية وقادتها الصباح قيادة التعميـــــــــر =بنوها واخدموها خدمة بالفعل مخلوفــــــــــه
صباحية مبارك خص وعياله احداة العيــــــــــر =شيوخ حظـونها وارتمت بالحضن مضفوفـــــــــــه
تتالت بالعهود وتوّجت بالنصر والتيسيـــــــــر =مذللة الصعاب تقودها بالدرب معسوفــــــــــه
هل العادات اهل دسمان قصر ولا بنوه قصيـــــــر =تلافاه الركايب من بعيد الدار مردوفـــــــــه
طوو ساسه وشدوا بالسواعد لبنة التسويــــــــر =ورا البيبان سور مزبن اللاجين بكفوفـــــــــه
كويت المستجير ومن ترعرع في ثراك يجيــــــــر =عسى الأحداث عنك بقدرة الرحمن مصروفـــــــــه
على ارضك ترجع الاسرى وتلتم الشمول بخيـــــــر =فرح طفل يغرد به حمام الورق برفوفــــــــــه
يسر الام ويعود الولد عاجل بلا تأخيـــــــــــر =وتبصر عين كانت من دموع الحزن مكفوفــــــــه

الشاعر/ خلف بن هذال