القسم الادبي
موت الكلام
صمت الحروف ….. والسلام الميت ع الكفوف
ووردة دبلانة ….. عايمة في أرض عطشانة
ضحكة باهتة وصفرا …. ع وشوش ماليها عفرة
وبيت خالي من الحنان … رغم الزحمة والجيران
لمة صبحت باردة …. وبوم بلون جناحها فاردة
وشوش بحزن كئيبة ….وفرحة مهاجرة وغريبة
انا باكتب إيه ؟؟ وعشان مين ؟؟ وليه ؟؟
عشان تقولي .. حلو وجميل ؟؟ ولا الله ع الحرف الأصيل ؟؟
لاوالله … ده بس عشان أحس بروح قلمي العليل
لما يبكي ع خلق راحوا … وفراغ الوقت وبراحهُ
وشوق فى الروح بيدبح … ونهار كان نفسه ينجح
لموا الورق والحروف … إقتلوها فوق الرفوف
إبنوا للعنكبوت فوق القلوب ……… بيوت
قاسية ليالي الشتا ….. وفكرة تايهة مشتتة
تنده فين الناس …. فين الجمال والإحساس ؟
سكوت الحروف مش معناها ياناس موت الكلام
