من اشعار جمال بخيت

جمال البخيت

هو جمال محمد أحمد بخيت، مصري الجنسية ولد عام 1954، تخرج من كلية الإعلام، له العديد من القصائد السياسية، فقد كافح بكتاباته في فترة حكم الرئيس السابق حسني مبارك، له مواقف سياسية كثيرة أيضاً أظهرها جميعها بقصائده، وأذكر بعضها هنا:

ارجع بقى

ارجع بقى

وفك حبل المشنقة

وامسح همومنا باللقا

ياجدرنا تحت التراب

يا حلمنا فوق السحاب

يا عمرنا طال العذاب

في الانتظار

رجعوا التتار

لكننا أشواك بتتحدى العطش

وجنود بتتحدى الفرار

نسقط ساعات

لكننا نفضل كبار

نفتح عيون للانبهار

متشوقة

فارجع بقى

وفك حبل المشنقة

وارفع راياتك يا أبى

قريش بتسأل عن نبي

يهديها من بعد العمى

خالد قتل مسيلمة

لكن جنوده الكدابين

عينهم في طابا

يتحدوا فرسان الخطابة

ويلجموهم بالسكوت

في عصر بيروت الحزين

خالد قتل مسيلمة

لكن جنوده الكدابين

بيفتتوا دلتاك بصبر

وبيحفرولى في سينا قبر

وبيركبوا نيلي العنيد

وبيخنقونى في الصعيد

بكلام نكت وبتريقه

فارجع بقى

دا الهزل زاد

والباشا إيده على الزناد

وصدقى بيصلى لفؤاد

وبيحلفوا نرجع عبيد

نتباع فى أسواق الكساد

الهزل زاد

والباشا إيده على الزناد

والسد جوه الفوهة

لو ينسفه تغرق بلادك كلها

وتعود سنين الأوبئة

تسكن ضلوعنا الضيقة

فأرجع بقى

الشمس سكنت كل غرب

حلفت ما ترجع للشروق

من أي شرق

إن لم تكن في الانتظار

انت وسيفك -والتتار تحت القدم-

فأقضى بصوتك على العدم

اعدل موازين الزمان

رتب نجومنا في الفضا

وأكسى وجوهنا بالرضا

بعد الشقى

دي الأمة لسه محتاجاك

والأرض لسه مهيأة

فأرجع بقى

مش باقي مني

مش باقي مني غير شوية ضيف عينيا

أنا هاديهوملك

وامشي بصبري ف الملكوت

يمكن ف نورهم تلمحي خطوة

تفرق معاكي

بين الحياة والموت

مش باقي مني غير شوية نبض ف عروقي

خُدي.. وعيشي..

وافتحي لي تابوت

أفرح بريحة ورد فرعوني

وربنا ف عوني

إذا دخلت الجنة ولاّ النار

هاشتاق إلي ضحكتك

وقعدتي ف الدار

والقهوة متحوجة

من طيبة العطار..

ف كل يوم الصبح

باشرب حليب قبطي

وف النهار والمسا

بامسك ستار الكعبة لو سبتي

واثبت إذا هربتي

أهديكي عمري وحسي وجوارحي

أهديكي جرحي

هو اللي باقي ف دنيتي لما خلص فرحي

مش باقي مني

غير شوية لحم ف كتافي

بلاش يتبعتروا ف البحر

بلاش يتحرقوا ف قطر الصعيد

ف العيد

بلاش لكلب الصيد.. تناوليهم

خدي اللي باقي من الأمل فيهم

وابني لي من عضمهم

في كل حارة مقام

وزوريني مرة وحيدة

لو كل ألفين عام

ألم الجراح يتلم

مش باقي مني غير شوية دم

متلوثين بالهم

مُرين وفيهم سم

كانوا زمان شربات

والنكتة سكرهم

شربتهم الخفافيش

في قلب أوكارهم

مش باقي مني غير شوية دم.. ماأقدرشي

أسقيكي.. مواجعهم

وبرضه ما أقدرشي

أرميكي..

وأبيعهم

يمكن ف مرة تعوزي تطلبيني شهيد

هاحتاج يوميها الدم

يمضي علي شهادتي

مش باقي مني

غير شوية قوة ف إرادتي

علي شوية شِعر من خطي

حاسبي عليهم وانتي بتخطي

وانتي ف صبح الدلال

بتعطري شطي..

مش باقي مني

غير شوية ضي ف عينيا

أنا مش عايزهم

لو كنت يوم هالمحك

وانتي بتوطي

في معركة مافيهاش

ولاطيارات ولاجيش

وانتي ف طابور العيش

بتبوسي إيد الزمن

ينولك لقمة

من حقك المشروع

مش باقي مني.. غير

شهقة ف نفس مقطوع..

بافتح لها سكة

ما بين رئة.. وضلوع..

ما بين غبار.. ودموع..

وأنا تحت حجر «المقطم»

ف الدويقة باموت

أنا.. والعطش.. والجوع..

يئن تحتي التراب

وانا صوتي مش مسموع..

ياحلمنا الموجوع..

من المرور ممنوع..

مستني لما يمر

موكب سلاطينك..

مش باقي مني

غير شوية رحمة من طينك..

علي شوية صبر من دينك..

مش باقي مني غير حبة غُنا تايهين

ف الضلمة مش لاقيين

حس الفواعلية..

ولا صوت مراكبي عَفي

فوق المعدية..

ولا صوت بناتي العذاري

في كل صبحية..

والغنوة.. أمنية

«ياما نفسي أقابل حبيبي..

وانا ع الزراعية»..

صوتك وصوتهم غاب..

وانا تحت حجر المقطم.. باموت لوحديّا..

الليلة راحت عيوني

تطل ع البستان..

وجناين الرمان..

رجعت لي توصف عناد الغل والدخان

وسحابة سودا تضلل

علي الغُنا الغلبان..

رجعت لي توصف هبوب الموت

علي الألوان..

رجعت لي توصف..

.. خيال الذل..

ف موائد الرحمن..

مش باقي مني غير شوية كُفر بشروقك

وأنا..

منبع الايمان..

مش باقي مني..

غير شوية ضي..

وعينيا

مش قادرة تلمحني..

في وحدتي محني..

خايف أموت م الخوف

والضعف يفضحني..

…

السجن عشش ف قلبي

وماشي ف شوارعك..

نفس اللي باعني وخدعني

بالرخيص بايعك..

هاشيل حمولي انا

ولا هاشيل حملك ؟!

ماعدت أملك شيء..

فيكي.. ولا فيّا

ولا قيراط ولا بيت..

ولا نسمة صافية تلاغي النيل بحرية..

مش باقي مني

غير شوية حب جارحّني

ولا باقي مني

غير شوية ضيف عينيا