قصيدة حزينة عن وفاة جاري , كلمات مبكية عن وفاة جاري , تغريدات حزينة عن موت الجار , صور عن رحيل الجار
البارحه في نومتي ماتهنيت
والليل طوّل واصبح الليل ليلين
سهران من حزني على الكوع تكيت
أونس بصدري مثل طعن السكاكين
من يوم راح الجار واخلالي البيت
حزني سطى فالقلب قبل الشرايين
ياجار ليش إنت عن البيت شديت
غيبتك عني فجرت بي براكين
بخفي دموع العين لكني أزريت
غصبن عليه تنحدر دمعة العين
من يوم قالولي رحل راعي الصيت
روح وخلى داخل القلب جرحين
واليوم ياجاري عليه ترا أخطيت
وش لون بعت اللي لجيرتك شارين
أدفع على رجعتك مهما تمنيت
والله لسوق أغلى الذهب والملايين
من اول أشوفك الى أقبلت واقفيت
واشوف قدم الباب لعب البزارين
ويا كم مره من دلالك تقهويت
لاجيتك مسير تبسملي أهلين
لاضاق صدري جيتلك ماتوذيت
تفتحلي قلبك قبل فتح الدواوين
واليوم ياجاري بعدت وتنحيت
شلت الفراش وشلت كل المواعين
الجار له عندي معزه وأنا أغليت
جيران بيتي كل بوهم حشيمين
وأنته على الجيران طفت وتعديت
في راس رجمن مابه الا المحبين
يالله ياللي فوق عرشك تعليت
ياقابل الدعوه وصلاة المصلين
تحفظ لي اللي راح وأخلالي البيت
ترفع مقامه عند نصب الموازين
