قصائد الشعراء عن اليوم الوطني السعودي
لااله الا الله الواحد الفرد الصمد
واحد نرجوه وحده ولا نرجو سواه
اسبغ الانعام والخير في هذا البلد
واكبر الانعام الاسلام والامن وحماه
بعد كنا في جهل والاسد ياكل الاسد
والضعيف تسلب حقوقه ولا له نجاه
والفقر سيف تسلط على عود ولد
والرجل ماهو بيضمن غداه ولا عشاه
جا معزي وانجلى من على العين الرمد
والسعد والخير جانا مع طلة نباه
السعد مايقبل الا مع وجه السعد
ياعسى الفردوس الاعلى من الجنه جزاه
جدد التوحيد والوحده بعزم وجهد
والشريعه طبقت فالرعيه والرعاه
وبعده عياله من سعود لا عصر الفهد
الملوك العادلين السلاطين الدهاه
ما نسينا لو مساكنهم بوسط اللحد
كل منهم منجزاته على وجه الحياه
وحن نعيش اليوم عيش الكرامه والرغد
عهد ابو متعب عسى الله يسدد في خطاه
القياده والمواطن مثل روح وجسد
يعرفون حقوقنا ونعرف حقوق الولاه
مانساوم في وطنا ولا فالمعتقد
ناقف ومن دونها الموت اخير من الحياه
وقفة لاشافها من نوى شر هجد
يدري انا مزلزلين الجبابرة الطغاه
تشهد الاحداث والواقع وكل شهد
ويعرفون انا هل الحرب لا دارت رحاه
حن بنعمه لكن اهل الحسد زادت حسد
من حسدها تربص لنا مع كل اتجاه
تتحد في ضدنا ولازم انا نتحد
ننبذ الفرقه وناقف سوا ضد البغاه
ياشباب انتوا عماد عليكم نعتمد
بعد ربي فيكم الظن مايلحق مداه
اعرفوا ان العلم يبني بيوت بلاعمد
والجهل يهدم صروح التقدم والغناه
وانتهي واقول يالله يالفرد الصمد
تحفظ بلاد الحرمين والدين وحماه
