عبارات عن الصيف , شعر جميل جدا عن فصل الصيف , قصيدة فصل الصيف

متى على الله تنطفي جمرة الصيف
ويهب من صوب الشمال البرادِ
ونشوف بيض المزن بالجو تصافيف
وميض برقه مثل قدح الزنادِ
لا هلّ سيله بالحزوم المجافيف
أقعد جمال الارض عقب الرقادِ
وصار الثرى مابين حبران وطريف
زلٍّ مزخرف مثل صنع الايادي
هناك أبا استانس ويكمل لي الكيف
مع رفقتي يمشون غاية مرادي
لامن شكيت الهم قاموا مخافيف
ثم وجهوا صوب الشمال الشدادِ
يبون بالقطّار عالى المشاريف
وإلا ورى الحره بذيك الوهادِ
لامن جلسنا بين حمرٍ مقاييف
عقب العصر والليل أقبل يهادي
هبت علينا باردات الهفاهيف
عطره مخلط بين نبتٍ وكادي
الله إلى مدّت زوالٍ مناظيف
ثم صفف الولاّع حول الرمادِ
صفر الدلال اللي بها ناعم الليف
والتمر قِرّب توّ وقت الجدادِ
صفّوا ومدّوا ينتقون السواليف
سوالفٍ بالصيد ما هي دوادي
في مجلس ما عذبوه الملاقيف
ما غير ربعٍ مصفيين الودادِ

وقت الرخا ربعٍ كرام مواليف
وعند العسر يعجبك صبر المهادِ
يا مرّني عصرٍ جميل تقل طيف
شرقٍ عن المظهور باتْلى جمادي
عصرٍ مضى واليوم مثل الخذاريف
مازال يحرق لاذكرته فؤادي
حوّل على قلبي خفيفٍ كما الضيف
وروّح وانا أصوّت باثاره وأنادي
ما شاقني والله حسن التواصيف
ريمٍ بعيدٍ مزبنه ما يصادِ
لكن يكلفني من الشوق تكليف
شمة ذعاذيع الهوى بالبوادي
ولا اظن باسْلى لو تزود التعانيف
حب الخلا بالقلب قصرٍ مشادي

يامنيف جتنا مقبله عطلة الصيف ؛ ؛ والبوك فاضي مامعي كود فكه

والناس شدت عفشها والمصاريف ؛ ؛ تبغى تغير جوّها والمضكه

ناسٍ تبا باريس ناسٍ تبا جنيف ؛ ؛ والصنف الاخر جالسٍ فوق دكه

وناسٍ نوت بالشرق سجه وتكييف ؛ ؛عند البراد ولاغشى القلب شكه

ناسٍ تذوق البيف من طبخة الشيف؛ ؛ وناس يدك كبودها الرز دكه

وانته وانا يامنيف من غير تكليف؛ ؛عفنا من الظهران حاره وسكه
نبغى نغير جوّنا بالمصاييف ؛ ؛ مير الدراهم صابت القلب وعكه

الحظ الاقشر في حياتي كما الضيف؛ ؛ لاقلت روّح قال ماعنك فكه