شعر عن الخسارة , قصائد حزينة على الخسارة -, عبارات مؤثرة عن الخسارة , خواطر عن الخسارة
شعر عن الخسارة , قصائد حزينة على الخسارة -, عبارات مؤثرة عن الخسارة , خواطر عن الخسارة
خلها على الله ماهي أول خساره
وياقلبي إصبر يمكن تكون خيره
إن كان ماوده يجي بإختياره
اللي خلقه الله خلق ناس غيره
ليته عرف هالبعد وشلون ناره
ماكان عندي يبعد ويروح ديره
الشوق بعثرني وطال إنتظاره
يعني خلاص الحب هذا مصيره
فواز عطني من باكيتك زقاره
وخدر لي الشاهي وخليه شيره
بجر صوت ماجلبته الحضاره
ميراث شايب ماختلف في مسيره
بعض الشعر يقثع عليك المراره
وبعضه يداوي كل نفس كسيره
وانا لعبت القاف وأربكت كاره
لكن عفته يوم حاسوا مريره
من صاروا الشعار نوره وساره
وسيمون اسمر هو يقود المسيره
بكره يصير الشعر رهن استعاره
يعني تقبل لو تهيجن شكيره
النفس طابت يوم كشف الستاره
يوم الكبيره تستوي بالصغيره
وادركت مافال جو ياكود فاره
استتبع الماخوذ ثم صار زيره
ودام انها ساحة لوي واستداره
بشوم عنها وياعساها سفيره
بطران لا والله شيخ البطاره
واعز نفسي عن نفوس حقيره
وعزاي بالعطار ورثه عطاره
واللي خدم مهما وصل تبع اميره
بنهي انا الموضوع وش لي بعاره
وارد للي ماتأنب ضميره
خل ظلمني ماعدلني بقراره
هو سبت احزاني وقلبي اسيره
اقفى ولادري وين صارت دياره
والمشكله ماعاد لي معه سيره
قامت تعذر جيته والزياره
وانا جروحي من بعاده خطيره
اومى بكفه وابتسملي بحقاره
وعرفت ريح المسك من نفخ كيره
هو يحسب ان الغدر فن وشطاره
بس مادرى ماطار بالحب طيره
فواز وينك ماتمد الزقاره
لي حروة الساعه ابيلي تعميره
يمكن مع الدخان تطخ الحراره
خص اذا شاهيك ياخوك شيره
وخلها علي الله ماهي اول خساره
واللي خلقه الله خلق ناس غيره
بدري عليك اللوم ياضايق البال
قلبك تحمل ضيقته وانكساره
مايفرح بحزنك سوى ناس عذال
والا الرفيق يذوق مثلك مراره
هيا كذا الدنيا سهالات واهوال
تاره تبسم لك وتبكيك تاره
فيها بشر عانت لاجل تبني اجيال
واشخاص عاشت لاجل تبني عماره
ريّح اركابك جامل الناس واحتال
على شعورك لاتبين دماره
وسرك لو ان تكشفه صار جوال
الناس تبغى الاكشنه والاثاره
ماكل حزنن يسكن القلب ينقال
بكره يدور اسمك على كل حاره
ولانتب اول شخص قالو بالامثال
النار دايم مبتداها شراره
إضحك ابوجه اعداك في كل الاحوال
لاجوك مقصودين سو استداره
خلك مع المحتال غامض ومحتال
ومع طرقته دامه امجاريك جاره
لو قال كيف الحال جاوبه بالحال
وضح له انك مبتهج بالزياره
ولاراح مايمنع لو تجر موال
جرة غريبن وده بشوف داره
وش تنتظر من ناس ماعندها اشغال
ناسن تحسب ان المغثه شطاره
وبعض المصايب تفرز اشكال واشكال
تظهر بها الرديان واهل النعاره
ولو تشخل اللي يعرفونك بمشخال
تقول انا أطيب بشر عن جداره
تشوف فزعة شخص ماهو على البال
واللي تهقوابه يسوق اعتذاره
واللي توقف له مواقيف الابطال
يقعد ويشمت فيك خلف الستاره
اياك والحقران في بعض الازوال
وترى الشكل ماهو دليل الطهاره
وماكل رجالن لبس بشت رجال
كم واحدن ماهو بيدينه قراره
واللي يجيك وللثقيلات شيال
هو اللي يفخر فيه بشت الاماره
عليك باللي يلحق القول بافعال
والا الردي خله وجنب مساره
انشهد انه ماكذب واحدن قال
من لايعدك ربح عده خساره
