شعر عن الامير متعب بن عبدالله , قصائد مدح الامير متعب , خواطر في الامير متعب بن عبدالله
يتعب الشعر مايلحـق مـدى متعـب
فيصلـي ٍ سنـود المجـد متعبـهـا
مير اباشيل طاروقي واقـوم العـب
لين اهيض فيافـي نجـد واطربهـا
ودي اتكي على جال الفخر وارقـب
هـدة الحـر مـن عالـي مراقبهـا
ودي اقرا مطاليـع السعـد واكتـب
شاعر وقفتـه يـا اميـر حاسبهـا
كل شمس ٍ بشعري دنقـت تشـرب
لبد الصبح الابلـج فـوق غاربهـا
ياهلا وابـرك الساعـات يامرحـب
من هجوس ٍ تزاحـم لـك مناكبهـا
ياعريب السلايـل طيـب المجـذب
يـازبـون المـكـارم يامعزبـهـا
المعالـي علـى شـرواك ماتصعـب
نوخت لك علـى الطـاري ركايبهـا
كل مال السحاب .. لهامتـك يقـرب
وانت عينـك علـى نايـد كواكبهـا
انت ياسيدي يرقـى لـك المنصـب
والهلايـم تحـدر فـي مناصبـهـا
قبل ماتنفـذ الرتبـه علـى المنكـب
بنـدق العـز ياشـيـخ امتنكبـهـا
وقفتك للوطن يوم السمـاء حثـرب
وارجفـت شـرق والله متغاربـهـا
يشرق الطيب وفلول الـردي تغـرب
وارض الابطال ماتصفـي مزاهبهـا
من ثنى عن سما مكه وعن يثـرب
ماتقصـر يدينـه عـن مواجبـهـا
عشت يراس مال الـدار والمكسـب
يافريـق الحـرس قـدوة كتايبـهـا
كل جندي لمرسـوم الفهـد شرهـب
زينها لا لفـت مـن راس شايبهـا
عمك اللي مدح طيبك وجيت اطيـب
هقوتـه طـال عمـرك ماتخيبـهـا
ياولد راعي الطـولات ابـو متعـب
هيبتك من وريـد البـرق شاربهـا
حدث الشعر جاب .. بسيرتك واسهب
كنـه اللـي علـى صـدره مغيبهـا
امدحـك والقصيـد القـرم مايكـذب
كلمة الحـق تاقـف عنـد واجبهـا
لو نهج الحقايـق مالهـا .. مجنـب
من يبي الشمس بالغربـال يحجبهـا
يتعب الشعر .. ليه الشعـر مايتعـب
وانت شيخ ٍ سنـود المجـد متعبهـا
ياللي بيدك الغيب ياعالي الشان …. أطلبك من مدات جودك كرامه
أنت الذي تفتح من الخير بيبان ….والكون كله في يدينك زمامه
وانت الذي حطيت للعدل ميزان ….في دولة تطنخ بعدل وزعامه
دوله لها في هامة المجد بنيان ….ساسه جويد ومنبع الاستقامه
أل السعود إن ثار عجه ودخان ….تطحن رحاهم مثل يوم الرغامه
حكمٍ زهاه الدين في كل الاركان ….والجهل قفى من بلدنا عسامه
واليوم في حكمٍ لطم كل طغيان ….في حكم أبو متعب سليل الشهامه
الحاكم العادل على كل الاوطان ….حكمه على بيداء الجزيره غمامه
حرٍ له البيضاء على راس ما بان ….تنشر لأبو متعب من أول فطامه
الله يحفظ القايد الوالد الحان ….والله يجيبه للوطن بالسلامه
تضماء له الانفس وتشتاق الاعيان ….وفقلوب شعبه يرتفع به مقامه
من بعدها سلام حشمه وعرفان ….يا سيدي متعب محل الفخامه
يالوافي الساطي لك أفضال وإحسان ….وتستاهل المنصب بكامل تمامه
مناصبك تلبس من المجد تيجان ….والمجد تملك في يدينك خطامه
في نظرتك حكمه وللخير عنوان ….الخير مع متعب غلاه وغرامه
وفي قلبك من الجود للناس شريان ….من جاك ما دارات عليه الندامه
ولك مدةٍ يروى بها كل عطشان ….كفك على المدات معلن هيامه
مواقفك يشهد بها كل ميدان ….تقلط على الموت الحمر بأبتسامه
وأنا وقفت وصغت بالشعر قيفان ….يا سيدي للحب فيها علامه
مشاعرٍ من شاعرٍ موعده حان ….إنه يعبّر بالولاء في كلامه
سطام أبن سلطان وإن كان ماكان …. دون الوطن روحه وساطي حسامه
جندي بثامن فوج يرأسه سلطان …. سلطان أبن ماجد بعيدٍ مرامه
نيابةٍ عنه ونيابه على شان …. نايف ولد ضاوي وكيله حزامه
جينا نهني ياسلايل كحيلان …. لك في مقام العز هامه وهامه
تزها بك الامداح والقاف طربان …. وصيتك مخلد لين يوم القيامه
وسلامتكم
