حواديت اطفال قبل النوم باللغة المصرية
حواديت اطفال قبل النوم باللغة المصرية في إطار تقديم مجموعة شيقة ومفيدة من القصص والحواديت للاطفال، يقدم لكم موقع محتوى اليوم حدوتة حسين واداب بر الوالدين باللهجة العامية المصرية، توضح للاطفال قواعد بر الوالدين واحترامهما.
حسين واداب بر الوالدين
كان يا مكان في قديم الزمان كان في ولد جميل وشاطر اسمه حسين، كان عايش مع باباه ومامته، وجده اللي كان بيحبه وبيجيب له لعب وحاجات حلوه كتير، وفي مره راح حسين لأوضة جده عشان يلعب معاه، فجده لاحظ ان تصرفات حسين مش كويسه وان الولد بيعمل حاجات غلط.
حسين بقى بيتكلم مع باباه ومامته بصوت عالي، ومش بيسمع كلامهم وعلى طول بيزعق، وطبعاً تصرفات حسين دي كلها عيب وغلط.
فضل جده ساكت وبيراقب حسين من غير ما يتكلم، لحد ما في مره كانت مامته بتكلم صاحبتها في التليفون، قرب منها حسين وزعق لها بصوت عالي وقاله: يووووووه انتي مش بتسمعي، أنا عمال اكلمك وانتي مش بتردي عليا، انتي مش بتسيبي الموبايل خالص من ايدك.
جده شاف الموقف وزعل جداً من أن طريقة تعامل حسين مع مامته بقيت مش كويسه، وبعدها بشوية مامته طلبت منه يساعدها في المطبخ فرفض حسين وقالها: أنتي مش شيفاني بتفرج على التلفزيون يا ماما، أنا مش فاضي اعمل حاجه معاكي، وكمان في مره رجع باباه من الشغل تعبان جداً و أول ما قعد على الكرسي حسين جري عليه وقعد يتنطط على الكرسي وهو مش عامل احترام لباباه.
حواديت قبل النوم مصريه
فضل الجد متابع حسين وهو زعلان منه، لانه كان بيتمنى يشوف حسين ولد مؤدب والناس كلها تحبه، لحد ما قرر جده انه يتكلم معاه ويعرفه ان كده غلط وعيب، وفعلاً جده أخد حسين في الأوضه وقعد معاه لوحده.
الجد: بص يا حبيبي، أنا عاوز اتكلم معاك في موضوع مهم.
حسين: نعم يا جدو في ايه؟
الجد: انا بصراحة شايف انك اليومين دول بتتصرف بأسلوب مش كويس مع ماما وبابا وده عيب لأنك ولد متربي ومحترم.
حسين: ليه يا جدو بتقول كده، هو انا عملت لهم ايه؟
الجد: الدين بتاعنا يا حسين حط لنا مجموعة آداب المفروض نتعامل بها مع مامتنا وبابانا، اسمها اداب بر الوالدين، وربنا هيحاسبنا عليها يوم القيامة، واللي بيعامل باباه ومامته كويس هيدخل الجنة، والاداب دي منها اننا نسمع كلامهم ونقولهم حاضر وماينفعش اننا نعترض ونقولهم اوووف أو يوووه، وكمان ماينفعش نعلي صوتنا عليهم ولازم نصبر لحد مايخلصوا كلامهم وبعدين نقولهم رأينا، ولازم نساعد ماما في شغل البيت ونحترم بابا لما يكون تعبان، لان طاعة الوالدين من طاعة الله.
قصص قصيرة بالعاميه المصريه
وقعد الجد يتكلم مع حسين وينصحه ويفكره بالمواقف الغلط اللي عملها مع باباه ومامته، وحسين قاعد مكسوف من جده وبيفكر انه ازاي عمل كل الحاجات الوحشه دي وهو مش واخد باله، وقال لنفسه: اكيد ماما وبابا زعلوا مني وكمان ربنا غضبان عليا دلوقتي عشان انا عاملتهم معاملة وحشة.
فقال لجده: أنا آسف يا جدو، قولي ازاي اصلح اللي عملته ده لو سمحت.
قاله: لازم في الاول تقول لبابا وماما أنا آسف عن كل الحاجات اللي عملتها وزعلتكم، وبعدين توعدهم انك مش هتعمل كده تاني، وانك هتلتزم بكلام ربنا واداب بر الوالدين.
رد حسين وقال لجده: حاضر يا جدو هقوم اعمل كده دلوقتي.
واعتذر حسين لباباه ومامته اللي بيحبوه اوي، وبقى يساعدهم ويحترمهم لأن ربنا أمرنا بكده.
