همس القوافي

رثاء حزين عن وفاة الملك عبدالله , قصيدة رثاء حزينة جدا , مرحوم يابو متعب

فزيت من نومي على صوت جوال
واثر الرسايل زفت النا مصيبه
فتشت جوالي بسرعه وعجال
واسأل من اللي في وفاته كريبه
قالوا ابو متعب سند كل رجال
اللي ملى هالكون جودن وطيبه
وقفت كنه ضارب القلب زلزال
وجلست انعي البدر حزة مغيبه
مرحوم ياللي موقعه عالي العال
مرحوم ابو متعب ودمعي سكيبه
تبكي معي هالارض بسهول واجبال
وحاول استحمل مصيبه صعيبه
مرحوم يالي له على العز افعال
ابكي كما ينعي حبيبـأ حبيبه
لو البكا ينفع غدا الدمع همال
والصدر ضايق ماتوقف نحيبه
لو ما النبي قبلك دفن بين الارمال
والناس في دفن البشر تقتدي به
ل أضعك بزجاجة عطر وارفعك عال
تبقى ولك عزك ومجدك وهيبه
لكن طبع الوقت والوقت ميال
و لا لنا الا الله ذا نرتجي به
يالله يالرحمن ياعالم الحال
ارحم فقيد الشعب ويالله تثيبه
واجزيه عن ما قام به خير منزال
وسكنه في اعلى الجنان الرحيبه
في جنة الفردوس له راحة البال
رحماك ياللي من دعا لك تجيبه
واخلف لنا خيرا على كل الاحوال
واحفظ واحرس مملكتنا الحبيبه
الوقت ماشي والمصايب بالاحمال
ونصارع اقدار الزمان العجيبه
موت النشاما قبل ما موت الانذال
والوقت هذا في طبوعن مريبه
احدن يموت وما تكلم بالاقوال
واحدن يجيه الموت في عمر شيبه
والصبر من ربي والاقدار تنهال
وكلن زمانه يوم يحزن يعيبه
ياليت لي تفكير وحساس الاطفال
اضحك ولو ان المصايب قريبه
يا رب تختمنا على خير الاعمال
ويا رب ترزقنا قلوبن منيبه
انا لله وانا اليه راجعون

مقالات ذات صلة

زر الذهاب إلى الأعلى