القسم الادبي

ابيات شعر عن الجنادرية , عبارات عن الجنادرية , قصيدة جميلة عن الجنادرية

ليا دعتني ديرتي وين ماكون
بديت دعوتها على كل بادي
قبل الوطن ينده عياله يلبّون
حيّ النّدا والله وحيّ المنادي
نفضت كلّ اللي بالأدراج مركون
حزني شقاية كبريائي عنادي
ونبشت حب في حناياي مخزون
ولقيت بيت عن أهل الشعر غادي
كل حب أرادي من تهاون به يهون
إلّا مدى حبّ الوطن لا إرادي
وش منوة الشعار يوم يتمنّون؟
يكود فرصة من منبر غير عادي
يعني مثل هالمنبر اللي تشوفون
هذي هي القمّة وغاية مرادي
بجنادرية موطني يشرق الكون

معلم حضاري عن حياة البوادي
موسم ثقافة ملتقى فكر وفنون
قامت تجيه النّاس من كل وادي
ما جيت أبيكم في قصيدي تحيّون
جيت ارّحب بكلّ ضيف ببلادي
يا مرحبا يصدح بها شعري لحون
من صوت أبو نورة لريشة عبّادي
يا مرحبا بلسان صادق وبعيون
آل القيم والمرجلة والمبادي
آل السعود اللي على العز يمشون
خلفة معزي مخلفين المعادي
في ظلّ أبو متعب شف الشعب وشلون
أصغر مواطن في حياته يفادي
نوفي مثل ما أجدادانا قبل يوفون
دون الوطن ما فيه موقف حيادي
لو ما أكون اللي أبي كيف ما كون
وإلّا عسى ما كون حزة هدادي
ماغايتي بالشّعر بيرق ومليون
ولا غايتي تصفيق بعض الأيادي

إن قيل لي وش غايتك قلت مفتون
مفتون في تمثيل راية بلادي

زر الذهاب إلى الأعلى